गणित,खगोलशास्त्र आणि विज्ञानाच्या अद्भुत प्रवासात गणित विभागाच्या विद्यार्थ्यांचा सहभाग
———————————————–
अमळनेर : प्रताप महाविद्यालयातील (स्वायत्त), गणित विभागाने दिनांक
२६ ते २९ सप्टेंबर २०२४ दरम्यान दोन दिवसीय शैक्षणिक सहल आयोजित केली होती. या सहलीत १९ विद्यार्थी आणि शिक्षकांचा सहभाग होता, आणि ती RUSA (राष्ट्रीय उच्च शिक्षण अभियान) यांच्याद्वारे प्रायोजित होती. सहलीमध्ये विद्यार्थ्यांना गणित, खगोलशास्त्र, आणि विज्ञानातील विविध क्षेत्रांमध्ये महत्त्वपूर्ण ज्ञान मिळाले.
. प्रस्तुत शैक्षणिक सहलीचे आयोजन प्रताप महाविद्यालयाच्या गणित विभागाच्या प्रमुख डॉ.नलिनी पाटील यांच्या नेतृत्वाखाली करण्यात आले होते, तर डॉ.वंदना भामरे, प्रा.रोहन गायकवाड, प्रियांका पाटील, प्रेरणा सोनवणे आणि इरफान पठाण यांनी या सहलीच्या यशस्वी आयोजनासाठी विशेष प्रयत्न केले.
दिनांक २७ सप्टेंबर रोजी, विद्यार्थ्यांनी मुंबई विद्यापीठाच्या गणित विभागाला भेट दिली. विभागप्रमुख प्रा. देसले यांनी या चर्चासत्राची व्यवस्था केली होती.
या चर्चासत्रात प्रा.ज्योत्सना प्रजापत,
प्रा.दिपक सुर्वे, प्रा.कमलाकर सुरवाडे, प्रा.मधुमिता गांगोपाध्याय,
प्रा.नितीनकुमार पोतदार (रुईया महाविद्यालय) आणि प्रा.नरेंद्र दसरे (RAIT, मुंबई) यांनी प्रताप महाविद्यालयाच्या विद्यार्थ्यांना विविध विषयांवर मार्गदर्शन केले. प्रस्तुत चर्चासत्रात गणित संशोधनातील सध्याचे मुद्दे, डेटा सायन्स, क्रिप्टोग्राफी, अल्गोरिदम आणि त्यांचे व्यावहारिक उपयोग यांवर चर्चा झाली. विद्यार्थ्यांना गणिताच्या विविध आधुनिक उपयोगांची सखोल समज मिळाली, विशेषतः माहिती तंत्रज्ञान, वित्तीय गणित आणि कृत्रिम बुद्धिमत्ता या क्षेत्रांमध्ये गणिताचा उपयोग कसा होतो, हे समजले.
संध्याकाळी विद्यार्थ्यांनी नेहरू तारांगणाला भेट दिली तिथे आयोजित केलेल्या “स्काय शो” मध्ये विद्यार्थ्यांना सूर्यमाला, ग्रह, तारे आणि खगोलीय घटनांबद्दल सखोल माहिती मिळाली.
या अनुभवातून खगोलशास्त्रातील गणिताच्या महत्त्वपूर्ण भूमिकेवर विशेष चर्चा झाली.
त्यानंतर, विद्यार्थ्यांनी जवळील आर्ट गॅलरीला भेट दिली, जिथे वेगवेगळ्या कलाकृतींचे दर्शन झाले. कलाकृतींमधील सममिती, आकारशास्त्र, आणि गणितीय दृष्टिकोन यावर विशेष विचारमंथन करण्यात आले.
२८ सप्टेंबर रोजी, विद्यार्थ्यांनी एलिफंटा लेणीला भेट दिली. या प्राचीन शिल्पकला क्षेत्रामध्ये गणितीय प्रमाणबद्धता आणि शिल्पकलेत गणिताच्या उपयोगाची चर्चा झाली. त्यानंतर, गेटवे ऑफ इंडिया या ऐतिहासिक ठिकाणाला भेट देण्यात आली, जिथे भारतीय इतिहासाच्या महत्त्वाच्या घटनांचा अभ्यास करण्यात आला.
दुपारच्या वेळेस जवाहरलाल नेहरू विज्ञान केंद्रात “ओडिसी” विज्ञान शो पाहण्यात आला. विद्यार्थ्यांनी विज्ञान केंद्रातील तांत्रिक प्रयोगांमध्ये सहभाग घेतला आणि गणिताच्या विविध वैज्ञानिक प्रयोगांमधील भूमिकेचे सखोल ज्ञान मिळवले. शोमध्ये विज्ञानातील महत्त्वाच्या शोधांवर प्रकाश टाकण्यात आला आणि त्यासोबतच विद्यार्थ्यांनी विज्ञान प्रदर्शनांमधील विविध प्रयोगांमध्ये सहभाग घेतला.
संध्याकाळी समूहाने दादर येथील Reliable Academy (UPSC, MPSC, SSC, Banking, RBI, SBI, IBPS, NDA, Railway Coaching Classes) दादर ला भेट दिली.
या दोन दिवसीय शैक्षणिक सहलीने विद्यार्थ्यांना गणिताच्या संशोधनात्मक आणि व्यावहारिक उपयोगांबद्दल सखोल ज्ञान दिले. विविध ठिकाणी भेट देऊन त्यांनी विज्ञान, गणित, आणि खगोलशास्त्राचे विविध पैलू समजून घेतले. याप्रसंगी सर्व विद्यार्थ्यांनी नव्या ज्ञानाने समृद्ध होत सहलीचा मनमुरादपणे आनंद घेतला.